Молитвы о детях. Тебе вручаю чадо мое

Молитва родителей об усопших детях

Го́споди Бо́же наш, Владыко живота и смерти! Услыши вопль мой, виждь слезы сетующего отца (печалующей матери) о чаде его (ея); приклони ухо Твое к молению моему и услыши смиренную молитву мою и не отрини ю от лица Твоего. Во умилении и сокрушении сердца моего молю Тя, Го́споди, помяни во Царствии Твоем душу усопшаго раба Твоего (имя) и сотвори ему вечную память. Молю Тя, Го́споди Бо́же наш, Твое́ю безпредельною к нам грешным любовию, не по беззакониям нашим воздаждь ему, ниже по грехом нашим сотвори ему, но по благости Своей, по Твоему неизреченному милосердию яви богатую милость в прощении и оставлении грехов усопшему рабу Твоему, чаду моему (имя), егоже дал ми еси. Прости ему, Бо́же, прости, Всещедрый, всякое согрешение вольное и невольное, отпусти ему все грехи его, от юности содеянные словом или делом, ведением или неведением. Вем, Го́споди, яко множицею согрешихом, неправдовахом пред Тобо́ю, ниже соблюдохом, ниже сотворихом, якоже заповедал еси нам, но молю Тя, прости согрешения наша, очисти беззакония наша, отпусти неправды наши, да не пребудут грехи наши на чадах наших. Аще же чадо мое, отшедшее к Тебе грех ради моих, недостойно суть милости, но достойно Твоего праведного гнева и осуждения, аще моея или своея ради вины не поучашеся в законе Твоем день и нощь, но бысть в веце сем яко раби мира, работая паче миру и плоти, неже Тебе Го́споду и Богу нашему, возлюбив прелести мира сего паче, неже слово Твое и заповеди Твоя́, предавашеся сластем житейским, временным паче, неже сокрушению о грехах, и, в невоздержании, бдение, пост и молитву забвению предаваше, темже убо молю Тя прилежно: прости, о Примилосердный Го́споди, прости отшедшему к Тебе рабу Твоему (имя), чаду моему, вся таковая прегрешения, аще в чесом повинен есть или ино что сотвори в мире сем, Го́споди! Ты воскресил еси дщерь Иаира по вере и молитве отца ея, Ты исцелил дщерь жены хананейской по вере матери ея, молю Тя, Сладчайший Иисусе, приими сице и мою смиренную молитву о чаде моем и избави его от смерти вечная и исцели душу его от греховных болезней. Повергаюся пред Твое́ю благостию и Твоим милосердием, умоляю Тя, Христе Бо́же мой, святым Твоим именем, умоляю Тя Твоими дражайшими заслугами искупления, даруй отшедшему к Тебе рабу Твоему всесовершенное прощение и оставление прегрешений, и воскреси в последний день не на суд или осуждение, но в прославление Твоея безконечныя милости во Царствии Твоем. Го́споди! Не затвори ему тогда двери Царствия Твоего, но сподоби услышати превожделенный глас Твой: «Приидите благословеннии Отца́ Моего, и наследуйте уготованное вам Царствие от сложения мира», яко Ты еси живот и воскресение наше и Тебе славу воссылаем, со безначальным Твоим Отцем и Пресвятым и Благим и Животворящим Твоим Ду́хом, ныне и присно и во веки веков. Ами́нь.

Показать оглавление

Комментариев: 0

Оставить комментарий